వచ్చిపోరా ఒక్కసారి...

ఆహ్లాదం పంచిన ఓ బాల్యమా! మళ్ళీ తిరిగిరావా

మది భావాల హోరును హాయిగా ఆస్వాదించేందుకు

వెంటనడిచే ఓ కాలమా! మరుపు మంత్రం చెప్పవా

మనసు మోయలేని భారాన్ని దింపుకొనేందుకు.

వెంటాడి వేధించే ఓ విధీ! ఒక ఇంద్రజాలం చేయవా

కనులు చూడలేని కాంతిలో కాలిపోయేందుకు

కడదాకా కలిసుండే ఓ నీడా! ఇకనైనా అలసిపోవా

వేదనతో పాటూ మోస్తున్ననన్నూ సమాధిచేసేందుకు

వెన్నెల పూయించే ఓ జాబిలీ! ప్రతిరొజూ పున్నమైరావా

కుమిలి వాడిపోయిన ఎద కలువలు విరబూసేందుకు

ఉరుము విదిల్చే ఓ వర్షమా! వేగంగా ఇటు వురకవా

ఉప్పెనై ఎగసిపడుతున్న కన్నీటి ధారను దాచేందుకు     

12/12/2013