నా చూపులూ నీలాంటివే !

నువు కోపంగా చూస్తున్నాననుకుంటావ్.
నీ చూపులకు నేను భయపడుతున్నాననుకుంటావ్.
అదంతా నీ భ్రమ.
నీవి చాలా పెళుసు చూపులు.
నాకెంత గుచ్చుకున్నా ఇట్టే విరిగిపోతాయి.

ఏ వాన జల్లో మెల్లగా తడిమినట్టు
ఏ పూల రెక్కో మెత్తగా తాకినట్టు
ఏ గాలి తెమ్మెరో ముందుకు తట్టినట్టు
నీ చూపులింకా ఉత్తేజాన్నిస్తాయ్.
నా మనసులో కొత్త ఆశలను రేపుతాయ్.

మైనంతో స్నానం చేసినట్టు నీ చెక్కిళ్ళు అలా ఎలా మెరుస్తున్నాయ్?
నిండు జాబిలి నెలవంకైనట్టు నీ పెదాలపై ఎప్పుడూ ఎలా నవ్వులు పూస్తాయ్?

నెమలి అందం నాట్యమాడేప్పుడు తెలిసినట్టు
నువు చీరలోనే ఎంతో బాగుంటావ్.
ఎవరు నేర్పారు? ఇలా పిచ్చెక్కించేలా చీర కొట్టొచ్చని.

సదా సీదా కాటన్ చీరే అది.
నీ మేని తాకగానే కొత్త అందంతో మురిసిపోతుంది.
లెదర్ హ్యండ్బ్యాగ్ కొద్దిగా పెద్దదే.
నీ భుజాలనుంచి జారి నడుముపై నాట్యం చేయడానికేమో.

ఎందుకింత సన్నగా ఉంటావో నువ్వు!
తింటున్నావో లేదో అని నా బాధంతా.
అలా గోర్లన్నీ కొరికేస్తున్నట్టు కనిపిస్తావ్.
కానీ నీ నెయిల్ పాలిష్ మాత్రం చెరగనివ్వవ్.

జారకున్నా నీ పైటనెందుకు పదేపదే సర్దుకుంటావ్.
నా చూపులు చిరుగాలులు కాదులే.
నీ చూపుల్లా నావీ చాలా పెళుసు.
అందుకే ఇన్నిరోజుల్నుంచీ నీ వెంట పడుతున్నా,
నన్ను నువ్వేమనట్లేదు. త్యాంక్యూ !!

08/11/2013






1 comment:

  1. ఇంతకీ ఆ చూపులుకలిపిన సుందరి ఎవరో.....ప్రేమ పాకాన్న పడినట్లే :-)

    ReplyDelete

Related Posts Plugin for WordPress, Blogger...