బహువచనం!

జీవితానికి బహువచనం ఎరుగని నేను
ప్రతి రెప్పపాటులో  లెఖ్ఖలేనన్ని జనన మరణాలను
ఇప్పుడు అనంతంగా రాశి పోసుకుంటున్నాను...

నలుపూతెలుపుల రాత్రీ పగళ్ల లేపనంతో
గుండెపగుళ్లను అమాయకంగా పూడ్చుకొన్న నేను
ఇప్పుడు కొన్ని రంగుల్ని కళ్ళలో ఇముడ్చుకుంటున్నాను...

గొంతుకకే దాహం ఉందని భ్రమించిన నేను
ఇప్పుడు అసలైన తృష్ణ తీర్చుకోవడానికి
కొన్ని ఆశలను మూటకట్టుకుసాగుతున్నాను...

చీకటి ప్రపంచంలో గురిలేని మిణుగురైన నేను
ఇప్పుడువెలుగుల దారుల్ని వెదుక్కుంటూ
కొన్ని నిప్పురవ్వల్ని మెదళ్ళో దాచుకుంటున్నాను...

17.07.2019 :: Wednesday :: @Sanipaya
*నన్ను కదిలించిన ప్రేరణకు.. ప్రణమిల్లుతూ...