|| నీ కోవెల ||

నీవు నడిచిన అడుగుల జాడలను
ఒక్కొక్కటిగా వొడిసిపట్టి తెచ్చిన మట్టిని
నా మనసు వనాల్లో వికసించిన
ప్రేమాసుమాలతో అర్చనలు చేస్తున్నా...

మెరిసే తారవైన నీవు
ఆకాశం వదిలి నా హృదయంలొ వెలిగితే
రోదించి కూలబడ్డ
ఆ భాష్ప జల మేఘాలతో
నీకు అభిషేకం చేస్తున్నా...

మైమరపించి ఉర్రూతలూపే
నీ కోకిల గానాలు
వసంతం వీడి నా చెంత చేరితే
విలపించే ఆ ఆమని నిన్నందుకోవాలని
చాచే తన లేలేత చిగురు కొమ్మలతో
నీకు మాలలు అల్లేస్తున్నా...

నీ హృదయంలో నాకు చోటులేదని తెలిసి
నువు కొలువైన నా హృదయాన్నే
ఓ కోవెలగా మలిచేస్తున్నా...

నువు తొలిచిన నా హృదయ లోయల్ని
నీ కోవెల ముందు కొలనుగా చేసి
నా కన్నీటి ధారలతో నింపేస్తున్నా...

27/08/2013