ఇంతేనేమో !!

శవాల్ని ఎంత పొదిగినా
సమాధులు ఊపిరి పోస్తాయా?
శిలల్ని ఎంత అడిగినా
సమాధానాలు మోసుకొస్తాయా?

కలల్ని ఎంత తొడిగినా
కాలచక్రం ఆగుతుందా?
కలతల్ని ఎంత కడిగినా
కారు చీకటి తొలగుతుందా?

ఆశలన్నీ వచ్చిపోయాక
ఏ ఎదురుచూపైనా ఎద తడుపదెందుకు?
ఆశయాలన్నీ చచ్చిపోయాక
ఏ ముందుచూపైనా మది తడమదెందుకు?

జీవితం పట్టాలెక్కాక
ఏ బాధ్యతైనా భుజం దిగదెందుకు?
జీవం మట్టైపోయాక
ఏ బంధమైన వెంటరాదెందుకు?

06/12/2013